ILOILO CITY – Padayon pa nga gina-imbestigaran sang otoridad ang ginapahayag abduction case sa Jereos Extension, La Paz, Iloilo City.
Ini matapos ang pagpa-blotter sang 13 anyos nga dalagita nga ginapahayag tuyo nga i-abduct sang tatlo ka mga wala makilala nga mga lalaki.
Sa interview sang Bombo Radyo kay Police Staff Sergeant Claren Baylon sang Women and Children Protection Desk sang La Paz Police Station, iya ginpahayag nga nagalakat ang biktima sa atubang sang simbahan sa nasambit nga lugar sang hinali nga nagpondo ang puti nga van.
Suno kay Baylon, hinali lang nga ginbutong sang lalaki nga nakasuksok sang mask ang 13 anyos nga biktima.
Ginpahayag ni Baylon nga may concerned citizen nga nakakita kag ginbutong paguwa sa van ang dalagita.
Bangud sini, gilayon nga nagpalagyo ang biktima kag wala na nakuha ang plate number sang salakyan apang iya nakita nga 3 ka lalaki ang sakay sang salakyan.
Sa pihak sini, nabalikdan pa sang biktima nga gintapungol sang isa sa mga suspek ang concerned citizen.
Nagapalangurog kag nagahilibion sa kahadlok ang biktima samtang nagapanugid sa natabo.
Ginapanawagan naman sang natungdan sa concerned citizen nga magpakig-angot sa ila agud nga makahatag sang dugang nga impormayson tuhoy sa insidente.
Samtang, lunsay nakasuksok sang itom nga panapton ang tatlo ka mga suspek nga nagtuyo sa pag-abduct sa 13 anyos nga dalagita sa Jereos Extension, La Paz, Iloilo City.
Sa interview sang Bombo Radyo sa biktima nga si alyas MM, iya ginpahayag nga halin siya sa eskwelahan kag isahanon lang nga nagpauli sang hinali lang nga nagpondo ang puti nga van kag ginbutong siya sang lalaki nga nakasuksok sang mask kag itom nga jacket.
Suno kay alyas MM, iya nakita nga ang isa sa mga suspek ang nagapungko sa front seat samtang ang isa naman amo ang nagamaneho sang salakyan.
Ginpahayag ni alyas MM nga lunsay mabukod ang panglawason sang mga suspek apang hinali lang siya nga ginbutong paguwa sa van sang isa man ka lalaki nga nakakita sa insidente.
Bangud sini, gilayon siya nga nakapalagyo kag wala na niya nakita kun ano ang plaka sang salakyan apang iya nabalikdan nga nagpanaog pa sa salakyan ang isa sa mga suspek kag gintapungol ang concerned citizen.
Antes pa man natabo ang insidente, ginpahayag sang natungdan nga wala siya sang may namutikan nga nagabantay ukon nagasunod sa iya.
Nahibalu-an nga ang biktima ang kamagulangan sa apat ka mag-ulutod kag ang iya ginikanan ang lunsay nagatrabaho.
