ILOILO CITY – Daku ang posibilidad nga makilala kag madakop ang mga suspek nga nagluthang sa tanod commander sang Zone 2, Brgy. Calumpang, Molo, Iloilo City.
Sa interview sang Bombo Radyo kay Iloilo City Police Office Director Police Col. Martin Defensor Jr., iya ginpahayag nga maathag ang kuha sang Closed Circuit Television rason nga makita gid ang nawong sang driver sang motorsiklo.
Suno kay Defensor, nagapasalamat siya sa bulig sang pamilya ni Tanod Commander Lemuel Villaruel sa ginapatigayon nga imbestigasyon.
Nagapati si Defensor nga indi gun for hire ang duha ka suspek bangud nga indi matanda ang gunman kag nakabalos pa ang biktima.
Samtang, daan nga hiligut-anon ang ginalantaw nga rason ni Defensor kun nga-a naulamid sa krimen si Police Staff Sergeant Ernie Arorong.
Ginpahayag ni Defensor nga antes pa man natabo ang pagluthang kay Villaruel, nadisgrasya sa motorsiklo si Arorong kag naka-angkon sang mga pilas sa lawas.
Sa pagkamatuod suno kay Defensor, ginkakibot ni Arorong ang balita nga siya ang ginadudahan nga amo ang nagsugo sa riding-in-tandem suspects nga patyon ang biktima.
Gin-athag man sang natungdan nga indi matuod nga ginhatagan sang suspension si Arorong sadto bangud sa guilty verdict tuhoy sa reklamo sang pamilyaVillaruel sa baylo, ini ang bangud sa indi niya pagtambong sa hearing sang kaso.
