LEGANES, ILOILO – Kapin sa tunga sa milyon ka pesos nga balor sang shabu ang nakuha sa anay pulis kag apat ka iban pa nga nadakpan sa buy bust operation sa Brgy. Bigke, Leganes, Iloilo.
Ang nasambit nga buy bust operation ang ginpatigayon sang Provincial Drug Enforcement Unit kag Leganes PNP sa diin siyam ka bulto sang shabu ang nakuha kag ginabanta nga ang isa ka bulto ang nagabili sang P40,000.
Lakip sa mga nadakpan amo sanday anay Patrolman Andy Aspero, 33, Jovan Zarragosa, 22, sang Brgy. Tabuc Suba, Jaro, Iloilo City, John Joseph Ravena, 28, sang J.C. Zulueta St, Oton, Iloilo, Liza Dionora, 39, sang Brgy. Poblacion, Calinog, Iloilo kag Joremae Mina, 31, sang Brgy. Bakhaw, Mandurriao, Iloilo City.
Sa interview sang Bombo Radyo kay Police Major Jonathan Pinuela, pinuno sang Provincial Drug Enforcement Unit, iya ginpahayag nga ang mga natungdan ang nabaklan sang P60,000 nga balor sang illegal drugs.
Suno kay Pinuela, si Aspero nga sadto na-assign sa Police Station 1, ang nagaserbe nga runner kag ginapahayag nga naghalin sa Negros Occidental ang supply sang illegal drugs nga iya ginabaligya.
Ginpahayag ni Pinuela nga ang transaksyon ang nagakatabo sa sulod sang New Bilibid Prison kag si Aspero ang nagahatag sa mga parokyano.
Santo sa impormasyon, si Aspero ang ginakabig nga High Value Target Level 2 kag nagbiya sa serbisyo sang 2013 matapos napasakaan sang kaso nga grave misconduct.
Magluwas sa illegal drugs, nakuha man sa mga drug personality ang drug paraphernalias kag cellphone.
Lunsay nagpamalibad nga maghatag sang pahayag ang lima ka drug personalities.
