CONCEPCION, ILOILO – – Padayon nga ginabulong sa hospital ang 77 anyos nga tigulang nga ginapahayag biktima sang pagpangawat kag pagpanglampus sa Brgy. Batiti, Concepcion, Iloilo.
Sa interview sang Bombo Radyo kay Police Staff Sergeant Ida Marcel Dumago, imbestigador sang Concepcion Municipal Police Station, iya ginpahayag nga ang biktima ang ginkilala nga si Mila Causing samtang ang suspek naman ang ginkilala nga si June Rey Clamares, 18, lunsay sang nasambit nga lugar.
Suno kay Dumago, mismo ang himata ni Causing ang nakasapo sa biktima nga may pilas sa dughan kag ilong, lusok ang mata kag ginapahayag nga ginhimuslan pa sang suspek.
Ginpahayag ni Dumago nga nabilin ang tsinelas sang suspek sa sulod sang balay sang biktima sa diin may yara sang mga witness nga amo ang nakatumod nga ginapanag-iyahan ini ni Clamares
Posible suno sa imbestigador nga gintinguhaan pa sang biktima nga makaguwa sa iya balay agud nga makapangayo sang bulig.
Ginatun-an pa kun ano nga mga kaso ang igapasaka sa suspek bangud nga wala man sang may nadula nga gamit kag indi pa matul-id kun ginhimuslan gid man ang biktima.
Suno naman sa suspek nga si Clamares, wala siya sang kaangtanan sa krimen.
Suno kay Clamares, isa pa siya sa mga nagbulig agud nga madala sa hospital ang biktima.
Ginpahayag ni Clamares nga siya ang gintudlo nga suspek bangud nga nakita ang iya tsinelas sa sulod sang balay sang biktima nga bisan siya ang wala man sang ihibalo kun nga-a nakalab-ot ang iya tsinelas sa balay sang biktima.
Sa pagpaathag sang suspek, sang amo nga tion, nag-inum siya kaupod sang iya mga abyan sa banwa sang Concepcion sa diin may yara pa sang gamo nga natabo rason nga naka-angkon siya sang mga bagras sa lawas.
Gindul-ong pa siya sang iya mga abyan kag nadagdag pa sila sa talamnan bangud sa tuman nga kahulugbon rason nga iya nga ginbilin sa kahon ang ginasukksuk nga tsinelas kag nag-pauli.
Sa iya nga pagpauli, didto na kag nabalahuba ang tuhoy sa natabo sa biktima apang samtang nagadugay ang pag-istorya sang Bombo News Team, nagalain-lain na ang pahayag ni Clamares.
