ILOILO CITY – Lunsay nakasuksok sang mask kag jacket ang duha ka mga suspek nga nagluthang-patay sa kolektor sang Metro Express Bus sa Mohon Terminal sa Arevalo, Iloilo City.
Ginapahayag nga ang biktima amo si Earl John Agudo, legal ang edad sang Villa, Arevalo, Iloilo City.
Sa interview sang Bombo Radyo sa witness nga nagpahinago lang sang pangalan, iya ginpahayag nga tupad niya ang lalaki nga dispatser sang natabo ang pagpangluthang.
Suno sa witness, wala gid niya nakita ang guya sang mga suspek bangud nga nakasentro ang iya atensyon sa pagkuha sang iya pamasahe.
Ginpahayag sang witness nga nakibot na lang siya sang may yara sang naglupok kag natumba na ang biktima nga may igo sa ulo.
Bangud sa kakulba, gilayon siya nga nagdalagan kag nagpanago sa isa ka balay malapit sa terminal.
Bisan sa sulod sang balay, nabati-an pa niya ang asud-asud nga lupok.
Gilayon nga nagpalagyo ang mga suspek pagkatapos sang krimen samtang ang biktima naman ang gindala sa hospital.
Samtang, isa ka mabuot nga sahi sang tawo ang biktima nga kolektor.
Sa interview sang Bombo Radyo sa driver nga nagpahinago lang sa pangalan nga Raymond, iya ginpahayag nga sa pila pa lang nila ka bulan nga pag-updanay, wala man siya sang may namutikan nga problema sa biktima.
Suno kay Raymond, apisar indi niya kilala sang personal apang wala gid niya ginlauman nga may matabo nga malain sa biktima.
