CABATUAN, ILOILO – Yara na sa Iloilo District Jail ang pagkustudiya sa negosyante nga si Vicente “Itik” Espinosa nga naka-hospital arrest tubtub subong matapos gindakop bangud sa kaso nga murder.
Matandaan nga sang Agosto 10, gindakop si Espinosa samtang yara sa Iloilo International Airport kag ginpreso sa Cabatuan Municipal Police Station apang pagkagab-i, gilayon nga ginpaidalom sa hospital arrest ang negosyante matapos naglain sang pamatyag.
Pagkaligad sang masobra isa ka bulan, nadakpan ang mga tinawo ni Espinosa nga nagpalusot sang beer sa hospital paagi sa pagsulod sini sa putos sang junk foods.
Sa interview sang Bombo Radyo kay Police Major Niño Leonard Amar, officer-in-charge sang Cabatuan Municipal Police Station, iya ginpahayag nga naka-hospital arrest sa gihapon si Espinosa apang ang Bureau of Jail Management and Penology na ang magabantay sa negosyante.
Suno kay Amar, may yara na sang commitment order nga igasaylo na sa Iloilo District Jail si Espinosa.
Sa bahin naman sang Bureau of Jail Management and Penology, ginkumpirma ni Jail Inspector Richard Servano nga ginsaylo na sa ila ang pagkustudiya sa negosyante.
Sa subong, ila na lang nga ginahulat kun san-o i-discharge sang doktor si Espinosa.
