ILOILO CITY – Pagpasanyog sang Tokhang Kontra Armas Luthang ang nakita nga solusyon sang Iloilo City Police Office sa sunod-sunod nga shooting incident sa syudad sang Iloilo.
Nahibalu-an nga subong nga bulan sang Nobyembre, naglab-ot sa 4 ka shooting incident ang natabo nga ginalakipan sa distrito sang La Paz, Molo, Lapuz kag Arevalo.
Sa interview sang Bombo Radyo kay Iloilo City Police Office Director Police Col. Martin Defensor Jr., iya ginpahayag nga kun lantawon, lunsay indi lisensyado nga armas ang ginagamit sang mga suspek.
Suno kay Defensor, nagakadapat nga pasangkaron ang kampanya kontra loose firearms sa diin dapat nga magbulig ang publiko sa pag-report sa kun sin-o ang nagahupot sang indi lisensyado nga armas luthang.
Ginpahayag ni Defensor nga magluwas sa pagpasangkad sang Tokhang Kontra Armas Luthang, may yara man sang Integrated Development Patrol Plan nga ginapatuman apang nagapangita lang sang kahigayunan ang mga suspek.
Sa bahin sang shooting incident nga natabo sa Mohon Terminal, may yara sang duha ka anggulo nga ginasundan ang otoridad apang ginatugyan na ni Defensor sa imbestigador ang paghatag sang pahayag tuhoy sa imbestigasyon.
