ILOILO – May ginasundan na nga suspek ang otoridad sa tuyo nga pag hold-up sa isa ka gasoline station sa Brgy. Baldoza La Paz Iloilo City.
Sa interview sang Bombo Radyo kay Police Captain Edgar Pagot, hepe sang La Paz Police Station, iya ginpahayag nga apat ka persona ang suspek sa nasambit krimen.
Suno kay Pagot, matuod nga wala nagagana ang Closed Circuit Television camera sang gasolinahan apang nakuhaan naman sang CCTV sang kaingod nga establisyemento ang ginhimu sang mga suspek.
Ginpahayag ni Pagot nga ginatan-aw nga posibilidad nga yara lang sa malapit ukon tumandok ang suspek bangud pamilyar sila sa mga pasikut-sikot sa lugar.
Sa subong, padayon ang imbestigasyon agud matumod na ang identity sang mga suspek.
