ILOILO CITY – Kritikal ang isa ka negosyante matapos ginluthang ang kaugalingon sa Brgy. Simon Ledesma, Jaro, Iloilo City.
Sa interview sang Bombo Radyo kay Police Senior Master Sergeant Arniel Villarante, pinuno sang Investigation Section sang Jaro Police Station, iya ginpahayag nga ang biktima amo si Nestor Castor Tubongbanua, 42, sang Brgy. Ma. Cristina, Jaro, Iloilo City.
Suno kay Villarante, gintiro sang biktima ang ulo gamit ang calibre 22 revolver bangud sa ginapahayag problema sa kwarta.
Ginpahayag ni Villarante nga naandan na sang biktima nga kaagahon nagabukas sang baligyaan apang kaina, baliskad ang natabo.
Sa pagpaathag sang imbestigador, sa baylo nga magbukas, nagpangtrangka sang pwertahan ang biktima kag nabati-an na lang sang mga kasilingan ang lupok sang pusil.
Bangud sini, gilayon sila nga nagtawag sang pulis kag sang ginbuksan ang pwertahan, nakita na lang ang biktima nga duguon.
Gilayon nga gindala sa hospital ang biktima agud nga madapatan sang nagakaigo nga pagbulong.
