ILOILO CITY – Nagreklamo ang isa ka drug personality matapos nadulaan sang P16,000 matapos ang ginpatigayon nga buy bust operation sa Mandurriao, Iloilo City.
Ang subject sang buy bust operation amo si Janibal Estrellas, 40, sang Brgy. Hibao-an Norte, Mandurriao, Iloilo City.
Sa interview sang Bombo Radyo kay Estrellas, iya ginpahayag nga ginsugo siya nga magbakal sang construction material balor P16,000.
Suno kay Estrellas, yara na siya sa atubang sang balaligyaan apang ginkakibot niya sang hinali lang nga nagdulog ang salakyan kag gindakop siya sang mga opetratiba.
Ginpahayag ni Estrellas nga indi iya ang nakuha nga 9 ka sachet sang suspected shabu kag P3,500 nga buy bust money.
Ang buy bust operation ang ginpatigayon sang Station Drug Enforcement Team sang Mandurriao PNP.
Samtang, suno naman sa utod nga si Gelcy Balgos nga indi drug personality ang iya utod.
Sa pagkamatuod suno kay Balgos, nagatrabaho sa isa ka glass and aluminum shop ang iya utod.
Gin-athag ni Balgos nga wala sang criminal record angiya utod nga si Estrellas.
