ILOILO CITY – Tatlo ka anggulo ang ginasundan nga motibo sa pagluthang-patay sa kolektor sang Metro Express sa Mohon Terminal sa Arevalo, Iloilo City.
Matandaan nga nag-angkon sang apat ka pilas sa ulo ang biktima nga si Earl John Agudo, 44 anyos.
Sa interview sang Bombo Radyo kay Police Senior Master Sergeant Mark Alano, imbestigador sang Arevalo Police Station, iya ginpahayag nga lakip sa mga motibo nga ila ginasundan amo ang daan nga hiligut-anon may kaangtanan sa trabaho, bisyo nga pauwak sang manok kag ang crime of passion ukon may kaangtanan sa paghigugma.
Suno kay Alano, may mga person of interest na sila sa kaso apang indi pa ini mapalayag bangud nga padayon pa ang imbestigasyon.
Ginpahayag ni Alano nga indi pa maathag kun ano gid ang motibo sa pagluhtang-patay sa biktima rason nga ila gina isa-isa ang posible anggulo nga mahimo makatudlo sa riding-in-tandem suspects.
Kun may daan nga hiligut-anon, ginpahayag ni Alano nga santo sa pahayag sang mga ka-trabaho, mabuot nga sahi sang tawo ang biktima.
Kun basehan naman sa pauwak sang manok, ginpahayag ni Alano nga indi man ini makabig nga bigtime nga bisyo kag wala man ginadula ang posibilidad nga may kaangtanan nga paghigugma ang motibo sa pagpatay sa biktima.
Samtang, posible guns for hire ang mga suspek nga nagpatay sa kolektor.
Sa pagpaathag ni Alano, mga malahalon nga armas ang gingamit sang mga suspek.
Mahimo nga may sarang ang nagsugo sa mga suspek bangud nga caliber 40 kag 9 mm pistol ang gingamit nga armas.
