ILOILO CITY – Natalana nga magapasaka na sang formal charges ang isa ka collector nga naga-alegar nga ginsakit sang negosyante nga si Vicente ‘Itik’ Espinosa samtang yara sa ospital.
Sa interview sang Bombo Radyo sa tagreklamo nga si Ruth Gabion, 54 anyos sang Brgy.Tanza, Bonifacio Iloilo City Proper, iya ginpahayag nga indi gid niya mabaton nga tigulang na siya apang ginsakit pa siya ni Espinosa.
Suno kay Gabion, wala man siya nagkulang sa paghimo sang iya obligasyon kag gintungdan niya ang pagpanukot amo nga indi niya maintindihan kun ngaa ginpatup-an gid siya.
Dugang pa sang natungdan, nagahulat na lang siya sa iya kompleto nga medical results agud makapadulong na sa Mandurriao Police Station.
Nahibaluan nga eksklusibo nga nagreklamo sa Bombo Radyo si Gabion sang Disyebre 11, bangud iya gin-alegar nga gintampa siya ni Espinosa kag ginpahog nga patyon lakip na ang pagsumbag sa iya sa apipingig.
