POTOTAN, ILOILO – Duha ang patay sa magkatuhay nga aksidente sa Pototan, Iloilo.
Ang una nga aksidente ang natabo sa Brgy. Batuan kun sa diin nabunggu-an sang trailer truck ang biktima nga si Richard Poral, 49, sang nasambit nga lugar.
Sa interview sang Bombo Radyo kay Police Staff Sergeant Amando Caporal, imbestigador sang Pototan Municipal Police Station, iya ginpahayag nga natabo ang aksidente sa maligwin nga bahin sang Brgy. Batuan rason nga wala sang may nakakita kun paano gid natabo ang aksidente.
Santo naman sa pahayag sang driver sang trailer truck nga si Ryan Tao sang Brgy. San Isidro, Jaro, Iloilo City, hinali lang nga nagtabok sa dalan si Poral kag na side swipe sang trailer truck.
Ginpanginwala man ni Tao nga madasig ang iya nga pagmaneho sang trailer truck sang natabo ang aksidente sa likuon nga bahin sang Brgy. Batuan.
Gindala pa sa hospital ang biktima apang gindeklarar nga dead on arrival matapos naka-angkon sang patal nga pilas sa lawas.
Samtang, sa aksidente nga nagluntad sa ginsang-an sang Rizal kag Ledesma St. sa banwa sang Pototan, ginbawi-an man sang kabuhi ang driver sang motorsiklo nga si Mariano Patosa, 40, sang Brgy. Igang, Pototan, Iloilo.
Nakabunggo sa dump truck ang motorsiklo nga ginamaneho ni Patosa nga magadul-ong lang kun tani sang pamahaw sang iya tiayon nga nagatrabaho sa isa ka burger stand.
Patal nga pilas sa ulo ang naangkon sang biktima nga nagtabog pa sang pila ka metros gikan sa ginluntaran sang aksidente.
Ginapahayag nga halin sa banwa sang Mina ang dump truck nga ginamaneho ni Cecilio Solido, 52, sang Brgy. Mina West, Mina, Iloilo.
