TUBUNGAN, ILOILO – Yara na sa estable nga kondisyon ang duha ka pulis nga kabahin sang security convoy sang 1st Iloilo Provincial Mobile Force Company matapos ginpalukpan sang anti-vehicle land mine sang New People’s Army sa Brgy. Singon, Tubungan, Iloilo.
Ang duha ka mga pulis amo sanday Police Staff Sergeant Ian John Lindo kag Patrolman Eric Galve kag kabahin sang walo ka sakay sang back to back police patrol.
Sa interview sang Bombo Radyo kay Police Lt. Col. Jay Malong, commander sang 1st Iloilo Provincial Mobile Force Company, iya ginpahayag nga halin sa detachment sa Brgy. Lanag Norte ang convoy kag nagapapauli na sa ila headquarters sa banwa sang Tigbauan sang natabo ang insidente.
Suno kay Malong, wala nakapalupok sang service firearm ang mga pulis bangud nga may mga pamalay sa lugar kag sa baylo, ginpadasigan na lang sang driver ang pagmaneho sang salakyan agud nga makapalagyo.
Bangud sini, ginpahayag ni Malong nga wala na natumod kun pila ka bilog nga rebelde ang nagpatigayon sang kalakasan kag wala man nahibalu-an kun sa diin nga direksyon sila nagpalagyo.
Samtang, gin-ako sang Napoleon Tumagtang Command – Larangan Dose nga sila ang responsable sa pagpalupok sang Improvised Explosive Device.
Suno kay Gibriela Tubungbanwa, tagpamaba sang Napoleon Tumagtang Command – Larangan Dose, ang insidente ang ila balos sa pagpang harrass sang otoridad sa ila teritoryo.
Ginpahayag ni Tubungbanwa nga isa ka tactical defensive operation ang ila ginhimo nga kalakasan.
Sang ginpamangkot kun sa diin ang ila teritoryo, wala man sang may ginsabat nga specific nga lugar ang natungdan.
Nahibalu-an nga ang insidente kasunod sang ceasefire sa tunga sang gobyerno kag sang rebelde nga grupo.
