TUBUNGAN, ILOILO – Duha ka rason ang ginalantaw ni Police Regional Office 6 Director Police Brigadier General Rene Pamuspusan kun nga-a nagpatigayon sang kalakasan ang New People’s Army sa Tubungan, Iloilo.
Sa interview sang Bombo Radyo kay Pamuspusan, iya ginpahayag nga mahimo nga kulang sa information dessimination tuhoy sa ceasefire ukon wala na sang komunikasyon ang mga matag-as nga NPA leader sa ila mga tinawo.
Suno kay Pamuspusan, naka full alert samtang yara sa defensive mode ang bug-os nga law enforcement unit tubtub sa Enero 7, 2020.
Ginpahayag ni Pamuspusan nga sa bahin sang gobyerno, ila sundon ang ceasefire apang indi sila magduha-duha nga magbato ukon magbalos kun tuman na nga nagalapas sa pagsulundan ang rebelde nga grupo.
Samtang, desidido ang Philippine National Police nga pasakaan sang kaso ang lima ka rebelde nga may kaangtanan sa kalakasan.
Suno kay Pamuspusan, lima pa lang ka rebelde ang nakilala kag mahimo sila nga pasakaan sang kaso nga attempted murder kag direct assault.
Nagapati ang natungdan nga mabaskog ang ebidensya batok sa rebelde nga grupo.
