ILOILO CITY – Nagpasalig ang Department of Tourism (DOT) Region VI nga makabangon ang turismo sa Western Visayas kasunod sang paglaslas sang Bagyo Ursula.
Sa interview sang Bombo Radyo kay Atty. Helen Catalbas, regional director sang DOT VI, iya ginpahayag nga napadayon ang assessment sa epekto sang bagyo sa Northern Iloilo, Capiz, Aklan, kag Antique.
Suno kay Catalbas, sa Northern Iloilo makit-an ang mga resort kag mga matahom nga isla apang sa subong, lunsay na nagkalawasak ang mga matahom nga disenyo kag cottages.
Sa Capiz, Aklan kag Northern Antique, ginpahayag ni Catalbas nga magadepende pa sa makuha nga data sa lugar ang ihatag nga ayuda.
Sa isla sang Boracay, ginpahayag sang natungdan nga may pila man ka mga resort nga naapektuhan sang bagyo.
Positibo naman ang pamunuan nga makabangon ang mga lugar nga naapektuhan sang bagyo kag mabalik ang mapagsik nga turismo sa amo nga mga lugar.
