ILOILO CITY – Mas tutukan sang kapulisan ang mga high-value targets agud matapna na ang kaso sang iligal nga droga.
Ini ang ginpahayag ni Philippine National Police (PNP) Chief Pol Lt General Archie Francis Gamboa sa iya pagbisita sa Police Regional Office (PRO) VI kahapon, Disyembre 27.
Suno kay Gamboa, natapos na ang mga small-value targets ukon ang street-level nga mga dalakpon kag tion naman agud hatagan sang dugang nga pgatamod ang mga dalagku nga persona sa likod sang illegal drug trade.
Dugang pa sang opisyal, magapadayon ang kampanya batok sa iligal nga droga bangud ini ang prayoridad sang administrasyon.
Madamo pa suno sa iya sang dapat nga kumbinsihon agud untatan na ang iligal nga buluhaton.
Kaangot diri, ginhatagan sang daku nga fund ang mga PROs agud matutukan ang mga drug operations.
Bastante pa ang fund suno kay Gamboa, apang ang paghatag sang fund sa PROs ang nagadepende sa accomplishment sang pamunuan.
Nahibaluan nga una na nga ginpahayag ni Gamboa nga may re-evaluation nga pagahimuon sa Enero 2020 kag kun makit-an ang kinahanglanon ang pagreshuffle sa mga opisyal, indi siya magpang-alang-alang sa paghimo sini.
Lakip man sa re-evaluation ang paglantaw sa performance sang support units kag D-staff.
