ILOILO CITY – Mahal ang kabuhi apang mas mahal ang Diyos kag mas malahalon ang iya kabubut-on.
Ini ang luyag sang Simbahang Katoliko nga ipahanumdom sa mga tawo sa pagselebrar sang Holy Innocents’ Day subong nga adlaw.
Ang Holy Innocents’ Day ang kilala nga Feast of the Holy Innocents ukon ‘Childermas’ sa diin santu sa New Testament, sa amo nga adlaw, gin-massacre ang 20,000 ka mga bata nga lalaki nga naga-edad sang duha ka tuig panubo nga ginakabig sang simbahan nga martir kag Saints of God.
Sa interview sang Bombo Radyo kay Msgr. Meliton Oso sang Jaro Social Action Center, iya ginpahayag nga mas madalom ang kahulugan sang nasambit nga kapistahan ipaanggid sa naandan sang kalabanan nga paglahog kag ‘pagdamuhal’ sa mga inosente sa kada pag-abot sang Disyembre 28.
Suno kay Msgr. Oso, ini ang nagapahanumdom nga si Jesus ang ginbun-ag sa simple nga pasungan kag siya ang nangin tawo para sa kalibutan.
Dugang pa sang natungdan, madamo ang mga Santos Inocentes ang naghalad man sang ila kabuhi kag sila ang ginakabig sang simbahan bilang pinakauna nga mga martir bangud wala sila nakahibalo sang ila daku nga sakripisyo.
Kaangot sini, ginhingyo ni Msgr. Oso sa publiko nga kaangay sa mga Santos Inocentes, dapat nga mangin handa man ang tanan sa paghalad sang kabuhi kag pagsakripisyo.
Ini ang pahanumdom man suno sa natungdan nga mortal nga sala ang pagpatay, bata man ukon tigulang, apang makabig lamang nga husto ang kamatayon kun ang kabuhi ang ginbuwis para kay Jesus.
