ILOILO – Padayon ang pagpanagtag sang bulig sa mga pumuluyo nga apektado sang paglaslas sang bagyo Ursula sa Northern Iloilo.
Sa interview sang Bombo Radyo kay Dr. Jerry Bionat, pinuno sang Provincial Disaster Risk Reduction and Management Office (PDRRMO), iya ginpahayag nga ginadul-ong na ang relief goods lakip na ang bugas, kape, iban nga mga pagkaon, kag tubig sa Quinto Distrito.
Una na nga gindeliver ang bugas sang Hwebes.
Ang Department of Social Welfare and Development (DSWD) Region VI naman ang naghatag man sang ila mga donasyon nga food packs kahapon.
Suno kay Dr. Bionat, agud madugangan pa ang ayuda ilabi na sa mga pumuluyo nga wala pa nakahalin sa mga evacuation centers, may Memorandum of Agreement (MOA) ang probinsya kag ang National Food Authority (NFA) para sa dugang nga suplay sang pagkaon.
Samtang, gin-athag ni Dr. Biona nga sa opisyal nga listahan sang Iloilo PDRRMO, 12 ang patay.
Wala na ginlakip ang ika-13 nga patay bangud suno sa natungdan, nagapuyo ang biktima sa Pilar, Capiz kag nasapwan lang sa Balasan, Iloilo.
Dugang pa sang natungdan, kinahanglan man nga isekyar sang mga pamilya sang namatyan ang mga requirements lakip na ang death certificate, police report, kag ang certificate nagikan sa medical officer agud nga masumite sa DSWD kag mahatag ang ang nagakaigu nga bulig pinansyal.
