ILOILO – San-o bala sarang mangin ‘blessing-in-disguise’ ang hilanat?
Para sa isa ka pamilya sa Sitio Dawis, Brgy. Poblacion, Ajuy, Iloilo, ang hilanat sang ila 6-anyos nga baby ang nagluwas sa iya sa posible nga risgo nga maiguan sang bala sang armas.
Alas dos sang kaagahon subong nga Mierkules, Enero 1, pila ka oras pagkatapos sang New Year’s eve celebration, sang nadiskubrehan sang pamilya Allador kag Arroyo ang isa ka bala sang ginapatihan 45 caliber pistol nga yara na sa foam nga nahamtang sa ikaduha nga panalgan sang ila balay.
Sa interview sang Bombo Radyo kay Marilyn Arroyo, ang tagbalay, iya ginpahayag nga sa amo nga foam masami nga nagatinir ang iya apo.
Apang sang tion nga natabo ang insidente, natabuan nga nagalain ang pamatyag ni Baby amo nga ginpapanaug ini anay sa idalom agud mag-upod sa iya iloy nga nagaluto sang ila pagkaon.
Lubos ang kahadlok nga nabatyagan sang pamilya sang marealisar na ang natabo — ano ayhan ang posible nga nadangtan ni Baby kun yara ini nagahigda sa amo nga foam?
Nahibaluan nga wala nabuslot ang foam apisar diri nagtupa ang stray bullet– posible bangud una ini nga nag-agi sa atop kag nagdulot ang pwersa sa balayan, amo nga sang nadagdag na sa foam, mahinay na lang ang tupa sini.
Apang indi ini gihapon maayo nga balita para sa pamilya, suno kay Arroyo, dapat nga ipursige ang imbestigasyon.
‘THE FIRST STRAY BULLET INCIDENT IN 2020’
Ini nga report ang una nga kaso sang stray bullet incident sa banwa sang Ajuy, kag mangin sa probinsya sang Iloilo kadungan sa pagselebrar sang bag-o nga tuig.
Sa interview sang Bombo Radyo kay Pssgt Ryan Alfin, duty investigator sang Ajuy Municipal Police Station, iya ginpahayag nga sa subong, nagapadayon ang imbestigasyon sang operations division agud matumod kun sin-o ang matuod nga tag-iya sang armas.
Gina-usisa man ang tanan nga registered gun-owners sa lugar.
Dugang pa sang otoridad, subject for examination pa ang bala agud mahibaluan kun sa ano partikular nga sahi sang armas ini naghalin.
