ILOILO – Magabalik na ang klase sa mga eskwelahan sa Quinto Distrito sa Lunes, Enero 6.
Sa interview sang Bombo Radyo kay Dr. Ruel Bermejo, schools division superintendent sang Division of Iloilo, iya ginpahayag nga handa na ang mga eskwelahan sa pagpadayon sang klase sa Lunes lakip na ang mga naapektuhan sang Bagyo Ursula nga naglaslas sang Disyembre 25.
Suno kay Dr. Bermejo, nagdangat sa 393 ka mga classroom ang naguba, 24 ang ginakabig ‘damaged’, kag 193 ka classroom naman ang nakaangkon sang mayor nga halit.
Ang mga eskwelahan nga may mayor nga halit ang nahamtang sa banwa sang Carles, Balasan, Estancia kag Batad.
Suno kay Dr. Bermejo, nagpatigayon sang pagsinapol kahapon, Enero 3, ang Division of Iloilo sa tanan nga manunudlo sa bilog nga Northern Iloilo kag ini ang ginhimo sa Sara National High School.
Lakip sa mga impormasyon nga nadiskusyunan amo nga ang iban nga eskwelahan nga may yara sang damaged classrooms ang maga-conduct sang klase sa gym ukon sa HE rooms kag sa iban nga espasyo nga pwede maklasehan.
Ang Balasan Central Elementary School ang magasugod sang klase sa Martes bangod kinahanglanon pa nga tinluan.
Sa mga pasilidad naman, ginpahayag sang natungdan nga may yara sang mga libro nga nabasa sang ulan apang nagmala naman ang iban.
Pahayag ni Dr. Bermejo, maga-request sila liwat sang suplay nagikan sa Department of Education, kag kasunod sini, nagalaum ang mga opisyal nga ma-approve sa gilayon ang ila gin-request nga quick respond fund.
