ILOILO – Handa ang Community Environment and Natural Resources Office (CENRO) sa San Dionisio, Iloilo sa pagbulig sa mga pumuluyo sa Northern Iloilo nga may reklamo sa pag-identify sang ila mga lupa nga gin-agyan sang baha sang naglaslas ang Bagyo Ursula sang Disyembre 25.
Ini ang gin-athag ni Department of Environment and Natural Resources (DENR) Region VI Asst. Regional Director Levino Duran.
Sa interview sang Bombo Radyo kay Duran, iya ginpahayag nga bastante man ang numero sang mga personnel nga mahimo makaatubang kag maka-akomodar sa mga pumuluyo nga magpadangat sang ila tagsa ka problema.
Kaangot naman sa titulo, ginpahayag sang natungdan nga ang relisado lamang nga lupa ang pwede mahatagan sang titulo kag ini man ang mahimo kun may yara na sang certificate nagikan sa CENRO.
Gina-tsekyar man sang amo nga pamunuan kun bala tax-declarant ang isa ka tawo nga naga-proseso para sa titulo kag kun bala ‘updated’ ang tax declaration.
Gin-athag ni Duran nga indi mahimo mahatagan sang titulo ang mga forest land.
Samtang, pahayag pa sang opisyal, para sa mga dugang nga problema, mas maayo gid kun unahon anay kadto ang CENRO antes magdiretso sa Regional Office.
