ILOILO – Dismayado ang Office of Civil Defense (OCD) Region 6 bangud indi handa ang kalabanan sang mga Local Government Units (LGUs) sa probinsya sa tion sang kalamidad.
Sa ginhiwat nga Regional Disaster Risk Reduction and Management Council (RDRRMC) VI Special Full Council Meeting kahapon, Enero 7, ginpahayag ni OCD Regional Director Jose Roberto Nuñez nga nasubuan gid siya sa mga kakulangan kag daw kaangay nga halos problema na lang ang gina-istoryahan kag wala sang solusyon.
Dugang pa sang director, daw kaangay nga wala pa nakatuon ang mga banwa sa nagligad nga eksperyensya sa diin nakaagi naman ang pila ka mga mabaskog nga bagyo kaangay sang Yolanda.
Sa ginplastar sang tagsa ka risk reduction and management offices halin sa mga munisipalidad, nahibaluan nga ang kalabanan nga problema amo ang kakulang sa maayo nga komunikasyon rason nga mahinay ang pagsulod sang report sa OCD.
Magluwas diri, nangin problema man ang kakulangan sang mga banwa sang disaster preparedness skills kag disaster facilities.
Kaangot sini, isa sa mga plano ni Nuñez amo ang pagpadulong kay Iloilo Governor Arthur Defensor Jr., agud i-presenta ang plano nga maka tukod sang 24/7 nga operation center.
Suno sa natungdan, wala sang otoridad ang opisina sang civil defense agud nga maghatag sang sanction sa mga LGUs agud nga mangin compliant sa mga memorandum sa disaster resilience, apang suno sa opisyal, tinguhaan niya nga ma-comply ini sang mga banwa.
Gin-rekomenda naman sang RDRRMC VI nga dapat may yara sang disaster resilient communication networks ang mga banwa ilabi na gid ang may daku nga risgo sang kalamidad.
Isa man sa rekomendasyon amo ang pag-invest sang dugang nga personnel nga amo ang maga-duty sa mga Emergency Operation Center, Incident Management Team, kag Response Cluster kag lakip naman ang pag-butang sang nagakaigu nga mga pasilidad sa mga ini.
