NEW LUCENA, ILOILO – Posible nga magpangatubang sang kaso ang bana matapos gintayaan sang armas-luthang ang kaugalingon nga tiayon sa Brgy. Pasil, New Lucena, Iloilo.
Sa interview sang Bombo Radyo kay Police Staff Sergeant Rodel Umahag, imbestigador sang New Lucena Municipal Police Station, iya ginpahayag nga ginadudahan sang tiayon nga si alyas Rose nga may yara sang kirida ang bana nga si alyas Ronnie.
Suno kay Umahag, mismo si Rose ang nagpa-blotter sa kaugalingon nga bana matapos ang insidente.
Ginpahayag ni Umahag nga antes pa man natabo ang insidente, nag-inom pa si Ronnie kaupod ang iya himata sang ginprangka ni Rose tuhoy sa ginapahayag pag-angkon sang kirida.
Naakig ang bana suno sa imbestigador nga rason sang iya pagpangtaya sang armas-luthang.
Sa subong, preso sa New Lucena Municipal Police Station ang bana kag natalana nga pasakaan sang nagakaigo nga kaso.
