JANIUAY, ILOILO – Magapangatubang sang kaso nga administratibo ang duha ka mga pulis nga ginapahayag naangot sa live streaming sang bulang sa Janiuay, Iloilo.
Ini ang kasunod sang ginpatigayon nga raid kun sa diin nadakpan ang 82 ka indibidwal.
Sa interview sang Bombo Radyo kay Police Major Jonathan Pinuela, pinuno sang Iloilo Police Provincial Office – Special Operations Group, iya ginpahayag nga nalakip sa recoveries ang 3 ka armas-luthang nga nakuha gikan sa vault nga ginabutangan sang gamit sa pagsulod sa ginalantawan sang live streaming.
Suno kay Pinuela, ang duha ka Glock pistol ang kumpirmado nga government issued firearms sang duha ka active police nga may rangko nga Police Corporal kag Police Staff Sergeant.
Ginpahayag ni Pinuela nga ang isa ka armas nga .45 caliber pistol ang indi niya makumpirma kun bala iya gid man sang suldado.
Sa subong suno kay Pinuela, madamu sang posibilidad kun nga-a nakita sa lugar nga ginluntaran sang raid ang armas sang duha ka active police nga wala anay ginhingadlan.
Ang pat-ud suno sa natungdan amo nga magapangatubang sang nagakaigo nga kaso ang duha ka pulis.
Samtang, dismissal ukon pasakaan sang kaso nga administratibo ang mahimo isilot kun mapamatud-an nga yara gid man sa bulangan ang suldado nga ginatudlo tag-iya sang .45 caliber pistol.
Sa interview sang Bombo Radyo kay Captain Cenon Pancito III, tagpamaba sang 3rd Infantry Division sang Philippine Army, iya ginpahayag nga may yara sang mandu nga ginadumili-an ang mga law enforcement personnel nga magpadulong sa bulangan ukon magpatigayon sang illegal gambling.
Suno kay Pancito, santo sa pagpangusisa, government issued firearm para sa mga suldado ang nakuha nga .45 caliber pistol kaupod ang duha ka pusil nga nauna nga natumod nga service firearms sang duha ka active police.
Ginpahayag ni Pancito nga sa subong, padayon ang preliminary investigation agud nga makumpirma ang impormasyon nga active military nga na-asisgn sa Capiz ang nagapanag-iya sang .45 caliber pistol.
