ILOILO CITY – Wala pa sa gihapon nahibalu-an kun sin-o ang suspek sa pagluthang sa 37 anyos nga lalaki sa Brgy. Nabitasan, La Paz, Iloilo City.
Ang biktima amo si Delfin Britanico kag nagamaneho sang BMW motorcycle nga duag yellow kag may plate number nga 3014NR.
Sa interview sang Bombo Radyo kay Darwin Celesio, iya ginpahayag nga naagyan niya ang biktima nga duguon kag nagahamyangon sa karsada.
Suno kay Celesio, ginhuna-huna pa niya nga naaksidente lang ang biktima apang iya nga ginkakibot nga may mga basiyo sang bala sa dalan kag may igo sa ulo, liog kag lawas ang biktima.
Ginpahayag ni Celesio nga may isa ka babayi nga naka-agi sa lugar nga amo ang nagpahibalo sa himata sang biktima.
Gindala pa sa hospital ang biktima apang ginbawi-an ini sang kabuhi.
Nakita sa crime scene ang basiyo sang .45 caliber kag 9mm pistol.
