ILOILO CITY – Madugay na nga naangot sa illegal drugs ang mag-utod nga Muller kun sa diin ang isa ang sa ila ang ginluthang-patay sang damlag lang sa Brgy. Cuartero, Jaro, Iloilo City.
Sa interview sang Bombo Radyo kay Brgy. Kagawad Jomart Lapidante sang nasambit nga lugar, iya ginpahayag nga may yara sila sang nabaton nga impormasyon gikan sa pulis nga naangot sa illegal drugs ang mag-utod nga Alain kag Mark Muller.
Suno kay Lapidante, indi niya makumpirma nga naangot sa illegal drugs ang mag-utod apang bilang Barangay Official, madugay na nila nga ginhingyo ang duha nga magsungka sa pulis kag magpaidalom sa drug rehabilitation.
Ginpahayag ni Lapidante nga antes pa man natabo ang insidente, natalana kun tani nga magsungka sa pulis ang biktima nga si Alian Muller alyas Kano, 42.
Sang una suno sa Barangay Kagawad, nagpamalibad si Alain nga magpaidalom sa drug rehabilitaion bangud sa rason nga masako siya sa trabaho bilang call center agent.
Sa pihak sini, ginpahayag sang natungdan nga sa ila barangay, wala man sang ginkaulamiran nga gamo ang mag-utod nga Muller.
Nahibalu-an nga ang utod ni Alain nga si Mark Muller, ang ginluthang-patay sadto sang riding-in-tandem suspects sa Brgy. Taft North sa distrito sang Mandurriao.
