BINGAWAN, ILOILO – Nagabitay na sa balayan gamit ang lubid sang nasapwan ang 21 anyos nga soltero sa Brgy. Alabidhan, Bingawan, Iloilo.
Sa interview sang Bombo Radyo kay Police Staff Sergeant Arlie Laruan, imbestigador sang Bingawan Municipal Police Station, iya ginpahayag nga ang biktima nga si alyas John ang nasapwan na lang sang iya himata nga nagabitay sa sulod sang kwarto sa balay sang iya lola.
Suno kay Laruan, ginapahayag nga problema sa eskwelahan kag sa paghigugma ang nagtulod kay John nga maghikog.
Ginpahayag ni Laruan nga sadto, nakapautwas pa sa iya mga himata ang biktima tuhoy sa iya problema kag sa tuyo nga paghikog.
Inoras antes ang insidente, nag-inom pa si John kaupod ang iya mga himata apang pagka-aga, wala na nakaguwa sa iya hulot ang biktima agud kun tani nga mag-eskwela.
Ginpwersa nga buksan ang hulot kag nakita na lang nga wala na sang kabuhi samtang nagabitay ang biktima.
