ILOILO CITY – Wala sang ihibalo ang mga kaupod sa simbahan nga naulamid sa illegal drugs ang mag-iloy nga Nosotros nga nakuhaan sang masobra P6 Million nga balor sang shabu sa buy bust operation sa Brgy. Ungka 2, Pavia, Iloilo.
Sa interview sang Bombo Radyo kay Lorena Betia sang Brgy. Buntatala, Jaro, Iloilo City, kaupod ni Jennifer Nosotros sa Assembles of God, iya ginpahayag nga mabuot nga sahi sang tawo ang iya abyan.
Suno kay Betia, 10 na sila ka tuig nga magkilalahay nga duha kag wala gid siya sang may nahibalu-an nga may nagabisita sa balay ni Nosotros.
Sa pagkamatuod suno kay Betia, ginabuligan si Nosotros sang iya mga himata sa pagpaeskwela sang iya kabataan.
Ginpahayag ni Betia nga si Nosotros man ang nangin palaagyan kun nga-a nakasulod sila sa Assembles of God.
