ILOILO CITY – Kulang sa disiplina ang mga tawo nga nagatabok sa dalanon nga wala man sang pedestrian lanes.
Ini ang obserbasyon ni Iloilo City Councilor Atty. Rommel Duron, chairman sang Committee on Transportation sang Iloilo City Council, sang siya ang nag-upod sa ginpatigayon nga walk-through sang Public Safety and Transportation Management Office sang Pebrero 6 sa Traffic Discipline Zone sa Sen. Benigno Aquino Jr. Avenue, Mandurriao, Iloilo City.
Sa interview sang Bombo Radyo kay Duron, iya ginpahayag nga apisar may mga nakabutang nga road signs nga nagadumili sa pagtabok, may mga salawayon sa gihapon nga mga pasahero nga indi makahulat kag wala na nagakadto sa Loading kag Unloading areas.
Suno pa kay Duron, mahimo nga taga-probinsya ang masami nga nagaagi sa lugar rason nga wala sila nakahibalo sang ordinansa.
Mahimo man suno sa natungdan nga indi makahibalo magbasa ang mga pasahero amo nga ginapabulag-bulagan lang ang mga road signs.
Kaangot diri, ginpahayag ni Duron nga dugangan pa ang mga Loading kag Unloading areas sa Traffic Discipline Zone.
Suno sa opisyal, ini ang santo man sa mismo panugyan ni Iloilo City Mayor Jerry Treñas.
Mas maayo man suno kay Duron kun sundon gid ang husto nga Loading kag Unloading areas — senior citizen man ukon indi ang pasahero.
Ini bangud may yara sang mga tigulang nga makasarang pa man, apang nagapagusto lang sang ‘para’ sang jeep sa bisan diin nga bahin sang dalanon.
Dugang pa ni Duron, may pagatukuron man nga mga waiting shed kag ipahamtang nga mga pulungkuan agud makabulig sa amo nga mga senior citizen kun sila ang nagahulat sang ila masakyan.
Iga-rekomenda man sang opisyal sa patigayunon nga Second Committee Hearing nga kun mahimo, istriktuhan ang multa sa mga bayolasyon sang mga drivers.
Ini ang posible magalakip sa suspension sang ila mga lisensya sa tion nga makapila na ka bes nga magbayolar sa mga pagsulundan sa trapiko.
Sa iban nga mga kasaypanan suno sa natungdan, mahimo man nga iimplementar ang community service ukon mas mataas nga multa agud mabatyagan sang mga motorista nga seryoso ang gobyerno sa mga ginpatigayon nga lihok ilabi na sa 14-kilometer stretch sa Traffic Discipline Zone.
Suno sa natungdan, plano man nga butangan sang dugang nga closed circuit television ukon CCTVs ang lugar agud nga mas mahapos ang pag-monitor sa mga traffic violators.
