LEGANES, ILOILO – Posible nga sa Bacolod City naghalin ang supply sang illegal drugs nga nakuha sa duha ka durugista nga nadakpan sa buy bust operation sa Brgy. Guihaman, Leganes, Iloilo.
Ang mga arestado amo sanday Bryan Bayona, 31, sang Brgy. Granada, Bacolod City kag Mark Sinoy, 36, sang Brgy. Mansilingan, Bacolod City, lunsay temporaryo nga nagatinir sa Brgy. Guihaman sa banwa sang Leganes.
Sa interview sang Bombo Radyo kay Police Captain Roy Tayona, hepe sang Leganes Municipal Police Station, iya ginpahayag nga 7 ka sachet sang suspected shabu ang nakuha sa duha ka durugista.
Suno kay Tayona, una nga nabaklan sang illegal drugs si Bayona kag bangud nga kulang ang dala, iya nga gintawag si Sinoy agud nga magdul-ong sang dugang nga supply.
Ginpahayag ni Tayona nga magluwas sa shabu, nakuha man sa duha ang P1,000 nga buy bust money.
Pila ka semana ang ginpatigayon nga monitoring antes nadakpan sanday Bayona kag Sinoy.
