ILOILO CITY – Ginahanda na sang Iloilo City Government ang Western Visayas Medical Center kag Western Visayas Sanitarium nga nahamtang sa Brgy. Inangayan kag Barangay Bolong Oeste, Santa Barbara, Iloilo agud pahamtangan sang mga mga Persons Under Investigation (PUIs) sa tion nga magsulod na ang coronavirus disease 2019 sa syudad sang Iloilo.
Sa interview sang Bombo Radyo kay Iloilo City Mayor Jerry Treñas, iya ginpahayag nga ini nga desisyon ang santo sa naistoryahan sa consultative meeting nga iya ginpatawag kaupod ang mga opisyal sang nanuhay-tuhay nga ospital sa syudad, Department of Health (DOH), kag City Disaster Risk Reduction and Management Council (CDRRMC).
Suno kay Treñas, una nga option ang Western Visayas Medical Center apang kun magdamo na ang pasyente, gamiton na ang Western Visayas Sanitarium.
Pahayag pa sang alkalde, handa man ang mga pribado nga ospital sa syudad nga magbaton sang mga PUIs apang limitado lang ang espasyo sang ila nga isolation room.
Ginpahayag sang opisyal nga ginabalay na ang standard protocols sa subong bangud mas maayo gid kun handa ang syudad sang Iloilo bag-o pa man maglala ang sitwasyon.
Sa bahin naman sang kapin 500 ka mga Filipinos nga sakay sang Japanese Cruise Ship nga natalana nga iga-repatriate sa pungsod sa masunod nga semana bangud sang kahangawa sa coronavirus disease, ginpahayag ni Treñas nga sa subong, wala pa siya sang ideya kun may nalakip nga Ilonggo sa mga ini.
Liwat nga gin-athag sang natungdan nga sa subong, wala sang nagpositibo sa coronavirus disease 2019 sa syudad sang Iloilo.
