ILOILO CITY – Nagpasalig ang Iloilo City Government nga handa ini sa pagbulig sa mga kabaranggayan sa syudad nga nangin low-compliant sa una nga hugnat sang road clearing operations ukon Oplan Hawan.
Sa interview sang Bombo Radyo kay Iloilo City Mayor Jerry Treñas, iya ginpahayag nga yara ang City Legal Office nga mahimo maka-assist sa mga opisyal sang barangay sa pagdihon sang ordinansa sa ila lugar kaangot sa pagtinlo sang mga obstruction.
Suno pa kay Treñas, yara man ang Barangay Secretariat kag kinahanglan nga magpamangkot lang ang mga barangay officials bangud indi man sila magpamalibad sa paghatag sang bulig.
Dugang pa sang alkalde, nakasapol naman siya sa 25 ka kabaranggayan sa syudad nga nakabaton sang manubo nga rating halin sa Department of the Interior and Local Government (DILG) bangud sa kakulangan sang implementasyon sang road clearing operations.
Nagalaum man ang opisyal nga magabutang na sang road signages ang mga kabaranggayan agud malikawan ang illegal parking.
Samtang, kaangot naman sa reklamo sang nga barangay sa syudad nga wala sila na-deputize sang Public Safety and Transportation Management Office (PSTMO) agud makapanakop sang mga naga-illegal parking, ginpahayag ni Treñas nga tun-an nila ang amo nga hingyo bangud nagapati siya nga persons-of-authority man ang mga opisyal sang barangay sa pag-apprehend sang salawayon nga mga driver.
