ILOILO CITY – Ginapatun-an na ni Iloilo City Mayor Jerry Treñas kay City Veterinary Officer Dr. Tomas Forteza ang hingyo sang mga hog-owners sa syudad nga istriktuhan pa ang pag-inspection sang mga frozen kag canned food nga ginabaligya sa Iloilo.
Ini bangud suno mga hog-owners, posible nga halin ang mga frozen kag canned food sa mga lugar nga apektado sang African Swine Fever (ASF) kag bangud sini, daku ang risgo nga dala sang mga ini sa swine industry sang syudad.
Sa interview sang Bombo Radyo kay Treñas, iya ginpahayag nga ginahugot naman sa subong ang monitoring sa mga pork products agud masigurado nga sa Iloilo Slaughterhouse gin-ihaw ang baboy kag wala naghalin sa kun diin-diin lang.
Nahibaluan nga bilang lihok batok sa ASF, tutukan sang Iloilo City Government ang bio-security sa mga barangay sa syudad sa diin may mga pumuluyo nga nagasagod sang baboy.
Una naman nga ginpahayag ni Forteza, ang gindesignar nga focal person sa ASF sa syudad, nga may yara na sang dugang pa nga 14 ka tawo nga gin-hire si Iloilo City Mayor Jerry Treñas agud magbulig sa monitoring kag surveillance sa mga merkado kag barangay sa syudad sa diin may ginabaligya nga karne sang baboy.
