ILOILO CITY – Ginaugtasan sang mga opisyal sa Brgy. Magsaysay, Iloilo City Proper ang nagapadayon nga illegal parking sa lugar apisar sang ginapatuman nga road clearing operations.
Sa interview sang Bombo Radyo kay Brgy. Kagawad Dodge Palomo sang nasambit nga barangay, iya ginpahayag nga ang on-road parking kag illegal parking ang rason kun ngaa 52% lang ang nakuha nga rating sang barangay sa una nga hugnat sang evaluation sang Department of the Interior and Local Government (DILG).
Suno kay Palomo, may mga salawayon gid nga pumuluyo nga apisar bag-o lang naabisuhan kag nahatagan sang memorandum sang nasambit nga pamunuan kaangot sa pagdumili sang iligal nga pag-park, wala ang mga ini nagapati.
Suno pa sa natungdan, wala naman sang iban pa nga obstruction sa barangay bangud na-implementar naman sang maayo ang Oplan Hawan.
May kaangtanan diri, kahapon nga adlaw, naglibot mismo ang mga opisyal sa barangay dala ang sako nga naprintahan sang NO PARKING agud madasig nga makit-an sang mga pumuluyo.
Ginalantaw man nga solusyon ang pag-mandu sa mga commercial establisments nga sila mismo ang magdisiplina sa ila mga customer agud masunod ang responsable nag pag-park sang salakyan.
