ILOILO CITY – Ginpatsekyar ni Iloilo City Mayor Jerry Treñas sa Joint Inspection Team ang mga warehouse sa coastal road sa syudad bangud ginadudahan nga kalabanan sang mga naga-operate ang wala sang business permit.
Suno kay Treñas, ginlantaw niya ang record sa city government apang gamay lang ang nakalista ipaanggid sa makit-an nga nagatindog nga mga bodega.
Dugang pa sang opisyal, indi niya ini pagpahanugutan bangud indi ini patas para sa mga negosyante nga nagdalikat gid sa Iloilo City Hall agud makagawad sang lisensya.
Suno sa alkalde, nagapadayon sa paglibot ang Joint Inspection Team sa syudad agud ma-istriktuhan ang pag-monitor sa mga mga negosyo nga wala sang business kag sanitary permit.
Sa subong suno kay Treñas may yara na siya sang lista sang mga establishemento nga ginrekomenda sang Joint Inspection Team nga ipa-sira bangud sa kakulangan nga maka-comply sang business permit.
Kaangot diri, lauman nga pulo ka team ang magalibot agud matsekyar ang mga business permits sang mga establishemento.
Suno kay Francis Cruz, pinuno sang Local Economic Investment Promotions Office, regular ang ginahimo nga operasyon sang joint inspection team.
Sa subong, lima ka team ang nagahulag apang dugangan ini sang duha pa ka grupo subong nga semana, kag kun kulang pa gid suno sa natungdan, posible nga hingyuon nila nga himuon nga pulo ka mga team agud malikop ang tanan nga distrito.
Suno pa kay Cruz, nalipay man ang pamunuan bangud mas madamo na ang nag-apply para sa business permit subong nga tuig.
Pahayag sang natungdan, ini ang pamatuod lang sang mainuswagon nga ekonomiya sang syudad.
