ILOILO CITY – Nagpanawagan ang Iloilo City Government sa mga barangay officials nga indi magkahadlok sa pagpatuman sang clearing operations sa ila lugar.
Sa exclusive interview sang Bombo Radyo kay Fernando Jose Rico, executive assistant for Barangay Affairs, iya ginpahayag nga nagakadapat magsunod ang mga opisyal sang barangay sa panawagan ni Presidente Rodrigo Duterte kag sa mando ni Department of Interior and Local Government (DILG) Secretary Eduardo Año nga hawanan ang mga nagasablag sa dalan.
Suno kay Rico, nagakadapat nga may political will ang mga barangay officials kag indi magkahalok nga kontrahon sang mga pumuluyo.
Ginpahayag sang natungdan nga indi na dapat paghulaton pa ang Task Force Hawan nga magapangbakbak sang mga pamalay kag istraktura sa mga dalanon.
Dugang pa ni Rico, sa tion nga magpadulong sila sa kada barangay, nagapatigayon man sila sang validation.
Nahibaluan nga ang version 2.0 ukon ikaduha nga hugnat sang clearing operations ang may 75 lang ka adlaw sa pagpatuman sang operasyon kag nag-umpisa sang Pebrero 16.
Kaupod man sang Office of the Barangay Affairs sang clearing operation ang Public Safety and Transportation Management Office (PSTMO) sa pagpamuno ni Mr. Jeck Conlu kag Anti Squatting and Illegal Structures Unit (ASISU) sa pagpamuno ni Mr. Love Joy Josenilla.
