ILOILO CITY – Ginalauman nga ang Police Regional Office 6 (PRO-6) ang labing una nga lugar nga makaangkon sang Regional Tactical Operations Center magluwas sa Philippine National Police national headquarters ukon Camp Crame.
Suno kay PRO 6 Director PBGen Rene Pamuspusan, naaprubahan na ni Deputy Speaker of the House Congressman Paolo Duterte ang pagtukod sang Regional Tactical Operations Center kag ini ang nagabalor sang kapin P70 million.
Suno pa kay Pamuspusan, sa una nga bulan pa lang sang iya pagpungko sa Western Visayas, nakit-an na niya ang pag-kinahanglan sang rehiyon sang amo nga center agud labi nga mangin hugot ang koordinasyon sa tunga sang mga provincial kag city police offices.
Dugang pa sang opisyal, labi pa nga nakit-an ang importansya sang Regional Tactical Operations Center sang natabo ang Iloilo Strait Tragedy sang Agosto 3.
Samtang, kahapon, Pebrero 24, ginpatigayon man ang blessing kag ceremonial turn over sang mga kagamitan nga kinahanglanon sang mga kapulisan sa Western Visayas.
Suno kay Pamuspusan, may yara sang 600 ka Galil ACE 22N nga armas nga gin-turn over sa bilog nga Western Visayas kag ini ang mas madamo ipaanggid sa mga nagligad nga administrasyon.
Sa sini nga numero, 65 ang nabaton sang Iloilo Provincial Mobile Force Company kag 65 man ang nabaton sang Iloilo City Mobile Force Company.
Magluwas diri, ginbaton man sang mga battalion commanders, provincial kag city police offices ang mga IT equipment, enhanced combat helmet, salakyan, kag mga radyo.
Kaangot diri, tuman ang pagpasalamat ni Pamuspusan sa liderato ni PNP Chief Police Director General Archie Francis Gamboa kag sa iya bug-os nga suporta sa Police Regional Office 6.
Dugang pa, ginpasalamatan man sang opisyal si Iloilo City Lone District Congresswoman Juliene ‘Jamjam’ Baronda sa iya suporta sa kapulisan.
Si Baronda ang nangin guest speaker sa ginpatigayon nga traditional flag raising ceremony kag sa 29th PNP Foundation Day Celebration sang PRO-6.
