ZARRAGA, ILOILO – Nagapabilin sa hospital ang 3 ka mag-ulutod matapos nga nalasakan sang 6-wheeler truck ang ila ginasakyan nga motorsiklo sa crossing sang St. Ville Subd., Zarraga, Iloilo.
Ang mga biktima amo ang mag-ulutod nga Saban nga sanday Princess Joy, Angel kag Peter Gabriel nga lunsay mga teen-ager.
Suno sa nakakita sa aksidente nga nagpahinago lang sa pangalan nga Louie, iya ginkakibot nga hinali lang nga may naglagapok kag sang iya ginlantaw, nalapakan na sang pang-ulihi nga royda sang truck ang motorsiklo kun sa diin sakay ang mag-ulutod.
Ginpahayag ni Louie nga gilayon nga nagpalagyo ang driver sang truck nga wala pa nakilala.
Gilayon nga gindala sa pinakamalapit nga hospital ang mga biktima apang wala pa sang kumpirmasyon tuhoy sa ila medical bulletin.
Kun ang amay sang mga biktima ang pamangkuton, duha sa iya mga anak ang yara sa kritikal nga kondisyon.
Suno sa amay nga nagpahinago lang sang pangalan, may nagpahibalo lang sa iya nga naaksidente ang iya kabataan.
