MIAG-AO – Mahimo kabigon sang Miag-ao Municipal Police Station nga sirado na ang kaso sa pagpatay sa isa ka 21-anyos nga lalaki sa Tumagbok Bridge sa Miag-ao, Iloilo sa tion nga matapos na ang autopsy examination sa bangkay sang biktima kag mapasaka na ang kaso nga murder sa mga suspetsado subong nga adlaw, Pebrero 26.
Ang biktima amo si Kevin Christian Soriano ukon alyas Boy-boy, isa ka kargador sa merkado sa banwa sang Miag-ao.
Samtang ang mga suspek naman amo sanday Rene Boy Nicar-Sesbino, 31-anyos kag utod sini nga si Renesto Sesbino, 25-anyos, residente sang Brgy. Dalije, Miag-ao kag si alyas Bibi,16-anyos, residente sang Brgy. Fundacion, Miag-ao, Iloilo.
Sa interview sang Bombo Radyo kay Police Captain Joevito Bose, hepe sang Miag-ao Municipal Police Station, iya ginpahayag nga kahulugbon lang ang ginalantaw rason kun ngaa nahimo sang mga suspek ang amo nga krimen.
Nahibaluan nga sang natabo ang insidente, nauna na nga nakatulog si Soriano, apang sang tuman na ka hubog ang tatlo, ginlampusan nila ini sang dos por dos sa ulo, ginlabu, ginsulod sa sako, ginkarga sa karito kag gindala sa idalom sang taytay.
Nahibaluan nga gin-ako man sang mga suspek ang ila ginhimo nga krimen.
Dugang pa ni Bose, antes sang insidente, wala man sang malain nga rekord sa kapulisan ang mga suspetsado.
Sa pihak nga bahin, nagapabilin pa nga yara sa isa ka punerarya ang bangkay ni Soriano.
