ILOILO CITY – Doble ang pagpanikasog sang mga opisyal sang mga kabarangayan sa syudad nga nakaangkon sang manubo nga score sa una nga hugnat sang validation sang Department of the Interior and Local Government (DILG) may kaangtanan sa road clearing operations.
Sa interview sang Bombo Radyo kay Punong Barangay Dandy Deocampo sang Brgy. Tanza Baybay, Iloilo City Proper, iya ginpahayag nga gina-amat amat na nila hitso ang problema sa mga poste sang Panay Electric Company (PECO) kag mga tubo sang Metro Iloilo Water District (MIWD) nga nagasabad sa dalan.
Magluwas diri, suno kay Deocampo, nagpahimo na ang mga opisyal sang barangay sang tarpaulin agud magserbe nga signage nga nagadumili sang illegal kag on-road parking.
Nagpasalig man ang natungdan nga sa sulod sang 75-day period nga ginhatag sang DILG, bawion nila ang manubo nga rating nga ila nakuha.
Sa pihak nga bahin, ginasigurado naman sang mga opisyal sa Brgy. Bolilao, Mandurriao, Iloilo nga mapadayon ang road clearing operations apisar wala ang mga personnel halin sa Public Safety and Transportation Management Office (PSTMO), Anti-Squatting and Illegal Structures Unit (ASISU), kag DILG.
Ini matapos nga nakakuha lang ang nasambit nga barangay sang 69 percent sa una nga evaluation sang DILG.
Sa interview sang Bombo Radyo kay Punong Barangay Joy Salpin sang nasambit nga barangay, iya ginpahayag nga nagabuligay ang mga opisyal sang barangay sa pagpanghawan sa kada Sabado.
Nagapaninlo man sila sa tion sang holiday.
Ginpahayag man ni Salpin nga nasubuan siya sa una nga score nga nakuha sang Brgy. Bolilao apang pat-od man suno sa iya nga mabawi na nila ini sa ikaduha nga hugnat sang evaluation.
