SOUTH KOREA – Nagalikaw ang kalabanan nga residente sang Seosan City, Chungnam Province, South Korea nga mag-guwa sa ila balay bangud sa kahangawa nga malatnan sang Coronavirus Disease 2019 (COVID-19).
Sa interview sang Bombo Radyo kay Rodney Queman direkta sa South Korea, iya ginpahayag nga boluntaryo nga nagpaidalom sa self-quarantine ang mga residente bangud sa kakulba nga malatnan sang virus.
Ginpahayag ni Queman nga ginkansela na sang South Korean government ang mga klase kag wala pa nakumpirma kun san-o ini magapadayon.
Ginpahayag ni Queman nga apektado man ang trabaho kag bisan sila nga mga Pilipino ang naapektuhan sang temporaryo nga ginsirado ang ila ginatrabahu-an nga kompaniya.
Sa ila balay nga ginatiniran suno sa natungdan, may yara sang kapin 20 ka mga Filipino, sa diin 15 sa ila ang nagatrabaho samtang ang iban amo ang asawa sang Korean citizens.
Indi tuman ang epekto sang COVID-19 sa ila probinsya ipanggid sa Daegu sa diin may yara sang panic buying sa pagkaon kag sa face mask.
Padayon ang paghatag sang abiso sang Philippine Embassy nga maghalong kag maglikaw anay sa pagguwa sa pampubliko nga lugar.
