ILOILO – Magatukod sang Taskforce on Tricycle, Pedicab, and Motorcycle (TPM) Operations ang Local Government Unit (LGU) sang Sara, Iloilo.
Ini ang kasunod sang Memorandum Circular 2020-036 sang Department of Interior and Local Government (DILG) nga nagadumili sa mga tricycle sa pagbyahe sa national highway kag subong man, nagamandu sa pagtukod sang tricycle task force nga separado sa tricycle regulatory board agud nga makadihon kag maka-review sang tricycle route plan.
Sa interview sang Bombo Radyo kay Mayor John Aying, iya ginpahayag nga ginatun-an pa sa subong ang amo nga plano bangud madamo sa mga pumuluyo ang ginalantaw nga maapektuhan sang amo nga memorandum.
Suno kay Aying, wala na sang iban pa nga alternatibo nga ruta bangud ang national highway lamang ang mahimo agyan padulong sa iban nga banwa kaangay sang San Dionisio, Lemery, Balasan, Ajuy kag Concepcion.
Suno sa opisyal, tutukan niya ang management kag monitoring sang pagbyahe sang mga tricycle.
