ILOILO CITY – Mas maayo kun athagon sang Department of Health (DOH) sa mga international airports ang advisory nga ila ginpa-gwa may kaangtanan sa coronavirus disease 2019 (COVID-19).
Sa interview sang Bombo Radyo kay Iloilo City Mayor Jerry Treñas, iya ginpahayag nga daw kaangay nga nabudlayan ang Bureau of Immigration (BI) kun ano ang ila nga himuon kun may mga turista nga halin sa South Korea.
Suno kay Treñas, nagakahangawa man ang mga hotel sa syudad sa tion nga magkadto sa ila lugar ang amo nga mga turista halin sa nasambit nga pungsod.
Bangud sini, gilayon man nga nagakadto ang mga tag-iya sang nanuhay-tuhay nga hotel sa Iloilo City Government agud magpakig-angot sa dapat himuon.
Gin-athag man ni Treñas nga nakapauli na sa South Korea ang kalabanan sang ila mga citizens nga nagpadulong sa Iloilo para sa daku nga aktibidad.
Nahibaluan nga nag-isyu sang travel ban ang Inter-Agency Task Force for the Management of Emerging Infectious Disease sa mga dumuluong halin sa North Gyeongsang Province sa South Korea.
Sa pinakaulihi nga rekord, naglab-ot na sa masobra 2,300 ang kaso sang mga infected sa South Korea, 13 ang patay — ang ikaduha nga may pinakamataas nga kaso sang COVID-19 sunod sa China.
