ALIMODIAN, ILOILO – 3 ang patay samtang 29 naman ang pilason matapos nga nahulog sa pil-as ang 6X6 truck sang Philippine National Police sa Brgy. Ginomoy, Alimodian, Iloilo.
Ang mga sakay ang lunsay perosnnel sang 601st Regional Mobile Force Battalion nga na base sa nasambit nga lugar.
Sa interview sang Bombo Radyo kay Albert, sa driver sang ambulance nga ginkargahan sang mga biktima, iya ginpahayag nga nagapasulod na sa kampo ang truck sang napatay ang makina sini.
Suno kay Albert, wala nagkagat ang preno sang truck rason nga nahulog ini sa ginabanta 100 meters nga pil-as.
Kalabanan sa mga biktima ang naka-angkon sang pilas kag nabali-an sang tul-an tuga sang pagkahulog.
Napilpilan pa sang truck si Police Captain Bonifacio Alabe, commanding officer sang 601st Regional Mobile Force Battalion.
Gingamitan pa sang backhoe agud nga maalsa ang truck kag makuha si Police Captain Alabe.
Bangud nga pil-as, nabudlayan ang rescuers kun paano makuha ang biktima samtang ang mga pulis nga nauna nga na rescue ang gin dala sa pinakamalapit nga hospital.
