ILOILO – Istrikto nga ginapatuman sa Iloilo Provincial Capitol ang pagpatuman sang protocol sa pagsulod sa building bilang paagi agud nga indi maglapta ang Coronavirus Disease 2019 (COVID-19).
Sa interview sang Bombo Radyo kay Provincial Administrator Atty. Suzette Mamon, iya ginpahayag nga santo sa Advisory 3 series of 2020, kinahanglan nga magpatigayon sang dugang nga preventive measures agud nga malikawan ang pagdamo sang pasyente nga nalatnan sang nasambit nga virus.
Suno kay Mamon, ang entrance para sa mga sibilyan ang yara sa Casa Real de Iloilo kag sa main entrance sang kapitolyo samtang yara naman sa likod nga bahin sang building ang entrance para sa mga empleyado sang Iloilo Provincial Capitol.
Magluwas sa Iloilo Provincial Capitol suno kay Mamon, sakop man sang nasambit nga advisory ang mga pasilidad nga ginadumala sang Iloilo Provincial Government kasubong sang Iloilo Sports Complex apang gin-una lang ang sa kapitolyo bangud nga kulang ang thermal scanner.
Sa pagsulod sa Iloilo Provincial Capitol, kinahanglan nga magpaidalom sa thermal scanner kag sabtan ang quick assessment form.
May kaangtanan diri, on-call naman ang mga personnel nga in-charge sa clinic samtang may yara man sang holding area para sa Person’s Under Investiugation.
Ang tanan nga mga nagasulod sa Iloilo Provincial Capitol ang ginahatagan sang sticker bilang pamatuod nga ginsunod nila ang protocol.
Ang nasambit nga pagsulundan ang magalawig tubtub nga may yara sang kaso sang COVID-19.
