MACAU, CHINA – Istrikto ang otoridad sa Macau, China sa pag-monitor sa mga pumuluyo kun pagsuksok sang face masks sa pampubliko nga lugar ang pagahambalan.
Sa interview sang Bombo Radyo kay Lovely, isa ka Overseas Filipino Worker (OFW) nga nagatrabaho sa Macau, China, iya ginpahayag nga ginapatuman ang 600 Macanese Pataca (MOP) (may katumbas nga kapin P4,000) nga multa sa mga madakpan nga wala nagasuksok sang face mask.
Suno kay Lovely, wala man ginapasakay ang mga tawo sa bus kun wala sila nagasuksok sang face mask bangud magluwas sa pagtinir sa balay, ini ang ginakabig sang kadam-an nga panaming batok sa coronavirus disease 2019 (COVID-19).
Pahayag ni Lovely, nagalab-ot sa kapin tatlo ka oras ang land travel padulong sa Wuhan, China — ang epicenter sang COVID-19 — amo nga nagakahangawa man ang mga tawo nga malatnan sang amo nga virus.
Dugang pa sang natungdan, may pila pa ka mga casino sa Macau ang wala sa gihapon nagbukas sa publiko.
Ini apisar sang mga reports nga ginbuksan na ang mga lugar-pasugalan pagkatapos sang duha ka semana nga pagsirado bangud sang coronavirus epidemic sa kondisyon nga nagasuksok sang mask ang mga tawo nga yara sa sulod.
Nahibaluan nga ang Macau, China ang ginakabig ‘biggest gambling hub’ sa kalibutan, apang may narekord nga pagnubo sa income sa subong nga tuig bangud sang coronavirus disease scare.
Sa subong, naglab-ot na sa masobra 80,000 ang kumpirmado nga positibo nga kaso sang amo nga balatian sa China — kag kapin 3,000 diri ang napatay.
