ITALY – Ginaka-alarma sang mga Pilipino sa Italy ang madasig nga pagtaas sang kaso sang coronavirus disease 2019 (COVID-19) sa pungsod sa diin naglab-ot na sa 52 ang patay.
Kapin 2,000 ka mga tawo naman ang infected kag kalabanan sang mga apektado ang nagikan sa mga rehiyon sang Lombardy, Emilia-Romagna, kag Veneto.
Sa interview sang Bombo Radyo kay Joy Maquiling, tumandok sang Pavia, Iloilo apang naka-base subong sa Rome, Italy, iya ginpahayag nga ginakabig nga pinakamalala nga sitwasyon ang naaminhan nga rehiyon sang Lombardia sa diin nagikan ang kalabanan sang casualties.
Suno kay Maquiling, madasig nga naglapta ang amo nga virus sa lugar matapos nga isa ka Italian national nga may travel history sa China, ang epicenter sang COVID-19 outbreak, ang nagbalik sa Milan, Italy kag wala gilayon nagpaidalom sa quarantine.
Pahayag ni Maquiling, bangud wala sa gilayon natatapan, naglaton ang amo nga sakit sa mga tawo sa airport, ospital, kag lakip na ang mga nakaupod sang biktima antes ini nahatagan sang nagakaigu nga pagbulong.
May yara naman sang mga simbahan sa Labordy suno kay Maquiling nga wala na nagpatigayon sang misa bangud sang pagpamahog sang nasambit na nga virus.
Isa ka pari suno kay Maquiling ang yara subong sa France bangud nagpositibo man ini sa COVID-19.
Sa bahin naman sang Rome, Italy, una nga nangin infected sang COVID-19 ang isa ka police officer kag firefighter.
Ang mga Pilipino suno kay Maquiling ang naga-eksperyensya sang pagpang-bully bangud kanawong sang kalabanan nga mga Pinoy ang mga Chinese nga amo naman ang gina-tudlo sang mga Italian nationals nga nagdala sang sakit sa Italy.
Sa subong, hugot ang mga lihok ang ginpatigayon sa Italy agud matapna ang amo nga sakit.
Ginhingyo ni Prime Minister Giuseppe Conte sa publiko nga indi mag-panic kag sundon gid ang panugyan sang otoridad.
