ILOILO CITY – Alalangay lang nga madamo sang ginapangatubang nga responsibilidad ang mga opisyal sang Iloilo City Government.
Ini ang mensahe ni Iloilo City Mayor Jerry Treñas kay City Councilor kag Liga ng mga Barangay President Irene Ong kag sa mga opisyal sang barangay nga nagareklamo nga indi sila makasarang sa pagsaway sa mga naga-illegal park nga salakyan sa dalan nga sakop sang ila nga lugar.
Nahibaluan nga una nga ginpahayag ni Ong nga indi na katungdanan sang Punong Barangay, Barangay Kagawad, Barangay Tanod kag iban pa nga opisyal sang barangay ang pagpangdakop sang mga nagapasaway sa ginapatigayon nga road clearing operations ukon Oplan Hawan.
Suno naman kay Treñas, bisan siya nga alkade ang indi man makaluwas sa mga ulubrahon kag kun kinahanglan, ginadala pa niya ang iban sang iya mga obligasyon sa ila balay.
Sa pagkamatuod suno kay Treñas, mas nagdamo pa gid subong nga tuig ang iya ulubrahon bilang local chief executive ipanggid sa una niya nga mga termino.
Nahibaluan nga antes ang pahayag ni Treñas, nagsabat man si City Department of the Interior and Local Governnment (DILG) Director Roy Defiño sa pahayag ni Ong sa diin iya gin-athag nga sakop pa sang katungdanan sang mga barangay ang pagdisiplina sa mga pasaway nga pumuluyo may kaangtanan sa Oplan Hawan.
