ILOILO CITY – Nakilala na ang bangkay sang lalaki nga nasapwan sa Brgy. Sooc, Arevalo, Iloilo City.
Ang biktima ang ginkilala kay Christian Cofreros, 29, pamilyado sang Purok Kawayan, Brgy. Banago, Bacolod City.
Sa interview sang Bombo Radyo kay Joanne Diergos, abyan sang pakaisa ni Cofreros, iya ginpahayag nga Miyerkules sang gab-i gin report nga missing ang biktima.
Suno kay Diergos, wala sang ihibalo ang pamilya kun ano ang motibo sa krimen magluwas lang nga nagatrabaho ang biktima bilang collector sa Express Lending House Corporation.
Ginpahayag ni Diergos nga iya nakita ang social media post sang iya abyan nga si Grace nga pakaisa naman sang biktima.
Bangud sini, iya nga ginpakig-angutan si Grace kag sa pagkamatuod, nagpadulong pa sa istasyon sang Bombo Radyo Bacolod ang pamilya sang biktima kag nahibalu-an nga may yara sang nasapwan nga bangkay sa syudad sang Iloilo.
Ginpahayag sang natungdan nga agud makabulig sa pagpangita sa biktima, bulontaryo siya nga nagpadulong sa isa ka punerarya kag paagi sa iya ginpakita laragway sang bangkay, positibo naman nga ginkilala sang pamilya nga si Cofreros ang nasapwan sa distrito sang Arevalo.
Nagapati si Diergos nga posible nga gindala lang sa syudad sang Iloilo ang bangkay sang biktima.
